Ibadah

Wamaa khalaqtul jinna wal insa illaa liya'buduuni = Teu sapati-pati Kami nyiptakeun jin jeung manusa anging pikeun ibadah ka Kami. (QS. Adz - Dzaariyaat : 56)

Makna ibadah nurutkeun ilmu Nahu (Tata Bahasa Arab) hartosna hamba ('abid), tina kecap 'abada, ya'budu, 'abdan.  Nyaeta manusa anu hirup laif, tuna harta tuna harti. Sagala aktifitas kahirupan estu geusan ngahambakeun diri ka Allah SWT.

Anapon prak-prakan ibadah kedah luyu sareng aturan tata cara anu tos dicontokeun ku Rasulullah SAW. Tegesna teu kengeng ngaya-ngaya perkara baru mangrupa bentuk-bentuk kagiatan ibadah anu sipatna nambihan atanapi ngirangan, sehingga nimbulkeun parobahan anu ngalantarankeun mengpar teu luyu sareng anu diajarkeun/dicontokeun ku Nabi SAW.  Mangka tata cara ibadah kitu tanwande baris di tolak ku Allah SWT, margi teu luyu sareng praktek ibadah sesuai conto Rasulullah SAW ngalangkungan hadits na nu soheh.

Allah SWT ngadawuh dina Al Quran : Wamaa aataakumurrasuulu fahudzuhu, wamaa nahaakum 'anhu fantahuu = Jeung naon anu diajarkeun ku Rasul ka anjeun amalkeun,  sarta naon anu henteu di ajarkeun (dicontokeun) tinggalkeun. (QS. Al - Hasyr : 7)

Ibaratna hiji jalma ngengkenkeun (ngadamel) anggoan ka tukang jahit. Pola sareng modelna tos aya.  Nanging sapengkereun nu ngengkenkeun, ku tukang jahit eta pola sareng model anggoan teh di robih kalayan maksad supaya langkung sae, langkung sampurna. Kitu cenah alesanana.

Sabadana rengse lajeng eta anggoan teh dipasihkeun. Otomatis nu ngengkenkeun teh kuciwa bahkan nolak alatan pola sareng model eta anggoan di robih.  Aya aksesoris panambih.  Antukna gaplah.

Pon kitu keneh dina hal peribadahan, contona dina bab solat.  Mangka wanti-wanti urang teu kengeng ngarobah kaifiat shalat anu tos dicontokeun ku Rasulullah SAW.  Pidawuh Rasul : Shalluu kamaa ra aitumuu nii ushallii = Prak aranjeun shalat saperti halna anjeun apal (nyaksian)  kami ngadegkeun shalat. (HR.  Ahmad, Bukhari)

Ma'asyiral muslimin!
Kunci ibadah tegesna ikhlas.  Ari ikhlas nyaeta ngalaksanakeun amal semata-mata hanya mengharap ridla Allah SWT.  mantena ngadawuh : Wamaa umiruu illaa liya'budullaaha mukhlisiina lahuddiini = Satemena aranjeun di parentah ibadah mung ka Allah kalayan ikhlas (dina)  ngajalankeun agama. (QS. Al - Bayyinah : 5 )

Dina ayat nu sanesna Allah ngadawuh : "Pok caritakeun, saestuna shalat abdi, ibadah abdi,  hirup jeung maot abdi, mung kanggo Allah, Pangeran nu murbeng alam. " (QS. Al - An'am : 62)

Nabi SAW nandeskeun dina haditsna anu diriwatkeun ku An - Nasa'i : "Aya hiji pameget nepangan Rasulullah lajeng tumaros, 'Kumaha numutkeun pamendak salira saupamina aya hiji pameget ngiringan jihad geusan milari pahala sareng katenaran?  Lajeng inyana (bakal) kengeng naon? Rasulullah SAW ngawaler : 'Manehna moal meunang nanaon!' Rasulullah neraskeun deui cariosanana : 'Saestuna Alloh moal nampa amal anging amal anu dilaksanakeun kalayan ikhlas lillaahi ta'ala tur milari karidlolanana.' "
Wallaahu  a'lam bishshawab. ***
@liliguntur